علا غانم : أعود لجمهور السينما بفيلم مع إلهام شاهين وهذه تفاصيل ظهوري بالماراثون الرمضاني

كشفت الفنانة علا غانم، تحضيرها لفيلم جديد يجمعها بالفنانة إلهام شاهين، معربة عن سعادتها الكبيرة بالتعاون معها، إلى جانب حديثها عن مشاركتها في الموسم الرمضاني المقبل 2024.

وقالت علا غانم في تصريحات تلفزيونية: أنا بموت في إلهام شاهين وأي حاجة معاها هعملها على طول، وفي فيلم بيتكلم عن المرأة وعلاقتها بجوزها ولسه بيتكتب ولكن المنتج اتكلم معانا علشان ياخد موافقات مبدئية.

أما عن تفاصيل مشاركتها في الموسم الرمضاني المقبل 2024، فعلقت علا غانم قائلة: في أكتر من عمل معروض عليا، ولكن أنا بوعد الجمهور إني هكون ضيفة خفيفة عليهم في رمضان.

كما أكدت علا غانم، أنها لا تمانع في تقديم سيرتها الذاتية ومشوارها خلال عمل فني، قائلة: معروض عليا أقدم مشوار الفني وحياتي في عمل فني، ولو هيتكتب بشكل يليق وفيه كل التفاصيل، أنا مش هبخل على جمهوري أبدًا أن نعمل حدوتة حقيقة.

وعن فترة غيابها عن الجمهور منذ 7 سنوات، علقت علا غانم: أنا بعدت 7 سنين وكنت عايزة أحس بحب الجمهور ليا، خاصة إني من الممثلين اللي قليل أوي حد يقولي برافو علشان خايفين أن ده يأثر على أدائي كممثلة، عايزين يحتفظوا بيا كممثلة، ورد فعل الجمهور فاق توقعاتي وكنت فاكرة إني لما هبعد أعمالي هتبعد معايا، ولكن مفيش شهر بيعدي إلا وعمل بيتعرض على الشاشة، وده بيدل على أن الجمهور بيحبني، وأنا حقيقي مقدرة حب الجمهور وأوعده أن اللي جاي أحسن كتير.

وعن إمكانية تقديم قصة حياتها في عمل فني، كشفت الفنانة علا غانم، عن استعدادها لتقديم مسيرتها الفنية، وحياتها الشخصية في عمل فني، مضيفة: معروض عليا أقدم مشواري الفني وحياتي في عمل فني، ولو هيتكتب بشكل يليق وفيه كل التفاصيل أنا مش هبخل على جمهوري أبدًا إننا نعمل حدوتة حقيقة.

وسبق وردت الفنانة علا غانم عن الانتقادات التي وجهت لأحدث أفلامها" حريم كريم٢" وقالت : عجبني في الجزء الثاني أننا راهنا على نجاحه أكتر من الجزء الأول، والجزء الأول كان قائما على صراع بين البنات مين اللي يفوز بالدونجوان بتاع الجامعة، والجزء الثاني في جيلين وبقى شكلنا جنبهم كبير إزاي، وعمق ومواضيع اكتر وأنماط مختلفة وكل شخصية كان عندها مشاكلها الخاصة اللي موجودة في مجتمعنا، وشايفة أن دي حالة نضج عند الممثلين والمخرج، وبقى في صراعات أكبر.

وأضافت علا غانم معلقة على الانتقادات التي واجهها العمل: أنا بشوف إن الفنان صفة من صفاته يكون حساس وإلا مش هيتقن الدور اللي بيقدمه، والفنان طول عمره من زمان وهو عنده درجة عالية من الحساسية، ولكن زمان كان بيواجه 5 مقالات انتقادات ولكن دلوقتي مبتنتهيش، والمفروض تنقي الألفاظ اللي متجرحش حد.

ووجهت علا غانم نصيحة للمقبلات على الزواج قائلة : نصيحتي للبنات يكونوا متأكدين أوى أنهم عارفين بعض بشكل كبير الموضوع مش من شهر ولا اتنين، لا فترة طويلة يقعدوا مع بعض.

وأضافت علا غانم: الجواز بشكل سريع فكرة غير سليمة ولا صحية، وأقول لكل بنت خدي وقتك ومتستجعليش، وخلصي جامعتك ياريت وبعدين شوية صغيرين حتى لو سنة أو اتنين، وفكرى دائما أنك ترتبطي عشان يكون عندك حالة نضج وتقدري تختار الإنسان المناسب.

وعن تجربتها في الزواج، أوضحت علا غانم: غلطت وأخذت القرار وأنا كنت تحت ضغط فظيع اللي هو يلا نتجوز يلا نتجوز.. ومن كتر الضغط للأسف استسلمت وكان قرار خاطئ من أول يوم.