بسمة بوسيل : لا أغفر الخيانة واتخذت هذا القرار بعد الإنفصال!

تحدثت الفنانة بسمة بوسيل لأول مرة عن أسباب انفصالها عن الفنان تامر حسني، وعن استمرار علاقتهما حتى الآن، وعودتها للغناء.

وقالت بسمة بوسيل في تصريحات تليفزيونية: إحنا وصلنا لمرحلة مكناش بنعرف نتكلم، طبيعة شغل تامر كمان صعبة ودايما محتاجة مجهود، لكن اكتشفت إن المشكلة فيا أنا بتعلق جدا بالأشخاص، ودي أزمتي، وروحت 3 مرات عمرة في سنة واحدة، أجري على الكعبة واشتكي والحمد لله بقيت راضية.

وأضافت بسمة: لما كنت بقعد مع نفسي وأراجع شريط حياتي كنت أقول ليه يحصل فيا كده! وهو أنا عملت إيه يا رب عشان يحصل فيا كل ده؟ وكنت ببقى متضايقة جدا، وحصل خضة ليا بعد طلاقي ووفاة والدي.

واستكملت بسمة حديثها: بعد جوازي من تامر حسني حصل حملات إلكترونية وأنا خفت لأني متجوزة حد مشهور جدًا، وده كان جديد وشهرة تامر كانت مستفزة ومخيفة وكنت صغيرة جدا وكنت بهتز وكان بيجوا قدام البيت يقولوا طلقها.. وشهرته كانت مخيفة في الأول بالنسبالي، وتضحيتي مش خسارة عشان هو يستاهل، ضحيت بالغنا عشان أتجوز الراجل اللي عايزاه يكون أبو عيالي.

وتطرقت بسمة بوسيل في حديثها عن الخيانة وقالت : مقدرش أغفر الخيانة.. وأنا بغير على مشاعري لأني أستاهل أكتر من كده، لما أبقى مع حد لازم يكون حاطط عينه في وسط راسه.

وأضافت بسمة: مش عايزة بنتي ترتبط بحد مشهور مش هرضى أبدا تتجوز واحد مشهور.. ولازم يبقى مؤمن عشان يتقي ربنا فيها، والشهرة لعنة وكنت حاسة إني محاصرة.

وكشفت الفنانة بسمة بوسيل، كواليس عودتها إلي الغناء من جديد من خلال أغنية أنا لا أتخان ولا أتهان وهي أغنية تتر نهاية مسلسل نعمة الأفوكاتو، بطولة الفنانة مي عمر، الذي يعرض حاليًا ضمن موسم رمضان 2024.

وقالت بسمة إنها تشجعت لأغنية أنا لا أتخان ولا أتهان منذ الوهلة الأولى لأنها وجدت بأن الأغنية مبذول فيها جهد كبير، معلقة: لما سمعت الأغنية حسيت أنها مبذول فيها جهد كبير من حيث الألحان والكلمات والتوزيع، وأنا في الأول الأغنية كانت رباعيات بس بصراحة بعد كده هم عملولي مفاجأة وقالولي أنها هتبقى في أغنية منهم تتر النهاية.

وعن ترشيحها للعمل، أوضحت بسمة بوسيل: المخرج محمد سامي ومي عمر عرضوا عليا أني أقدم التتر وغنيت كل حاجة بأداء وإحساس يقدر يوصل الحكاية، والحمدلله رد فعل الجمهور بسطني والناس حست إن إحساسي ماشي على شخصية نعمة ويارب أكون عند حسن ظنهم.

وحول علاقتها بـ المخرج محمد سامي والفنانة مي عمر، ردت بسمة بوسيل: صحابي وقريبين مني جدًا ومن أكتر الناس اللي كسبتهم وهما طيبين وجدعان أوي وأنا شهادتي فيهم مجروحة وانبسطت بالشغل معاهم، ومحمد سامي مخرج شاطر جدًا وكذلك مي عمر مبتقدمش أي عمل.