يسرا : عادل إمام صديق عظيم وهذه حكايتي مع القبطان المجنون 

تحدثت الفنانة يسرا عن علاقتها بالنجم عادل إمام متذكرة مواقف بينهما لا تنساها ساندها فيها دون أن تطلب منه مساعدة.

وقالت يسرا خلال تصريحات تليفزيونية:"عادل إمام في كل أزمة أنا مريت بيها في حياتي كان واقف معايا، مرة مكنش حد عارف مكنش عندي فلوس، كنت بشتغل لكن وقتها الفلوس مكنتش كتيرة، كان عندي عربية مرسيدس قولت أبيعها لحد ما ربنا يفرجها، لقيته جالي البيت بيسألني عايزة أبيع عربيتي ليه؟ سألته إزاي عرف؟ والكلام ده كان من 35 سنة".

وتابعت يسرا: "رديت عليه إني معنديش فلوس، قالي لأ متبعيش العربية، وخطط أن يكون في فيلم أشارك فيه وقالي أطلبي اللي إنتي عايزاه".

وأكملت يسرا حكايتها: "مرة كنت تعبانة جدا وبموت عملت عملية استمرت 6 ساعات والهيموجلوبين وصل لـ5، اتصل بيا وقالي أنه سمع إني تعبانة قلت له متجيش مش هتستحمل تشوفني، بس هو متابع وعارف كل حاجة".

تابعت يسرا وحكت موقفاً آخر مع عادل إمام الذي لم يكمل عرض مسرحية ما بعد معرفته أنها تعرضت لحادث قائلة: "عادل إمام عمره ما بيقفل المسرح، لكن في مرة حصلي حادثة كان لازم أخرج منها ميتة، كان وقتها بيقدم مسرحية من إخراج الأستاذ شريف عرفة، بمجرد ما عرف ختم المسرح وهو وشريف عرفة وعزت أبو عوف كانوا موجودين في لحظتها".

وأوضحت يسرا أن عادل إمام مش بس أستاذ فن هو أب وصديق عظيم، وعنده تقييم للبني آدمين مخيف، اللي ميبحوش من النظرة الأولى يفهمه".

وخلال اللقاء حكت يسرا عن موقف غريب تعرضت له بسبب معجب مجنون كان يرسل لها خطابات مكتوبه بدمه.

وقالت يسرا :"كان زمان المعجبين بيبعتوا جوابات، في 2 خضوني من طريقة جواباتهم كانوا مسميني نجمة السماء، وفي واحد كان بيكتبلي الجواب بدمه يعور نفسه ويكتب".

وتابعت يسرا: "الراجل ده أتجنن وراح الخانكة ومات هناك، كان قبطان بحري بيتكلم 7 لغات، في صحفي في جريدة حكالي أنه شاف الشخص اللي بيحبني وبيكتب جوابات بدمه، وطلبوا مني نروحله المستشفى نعمل حوار، روحت المستشفى معايا المصور والصحفي وأخدنا الإذن، شفت راجل بيتكلم اللغات بشكل هايل، شخص يظهر عاقل ووراني أنه بيحنط أي طائر أو قط يقع في المستشفى، عنده أوضة تحنيط، حسيته شخص عاقل وبيفهم، اتكلمت معاه حكالي إنه كان بيحب واحدة شبهي بالظبط زمان ووالدها رفضني واتخانق معاهم فجابوه المستشفى، وسألني ها أمتى هنتجوز؟

وتابعت يسرا حكايتها: "سألته إنت يرضيك أتجوزك من غير ما أروح اسأل بابا؟ وقلت له هروح اسأله وأرجعلك، فسألني ممكن أديكي الشبكة أنا محضرهالك؟ كنت أبتديت أحس بالقلق، ولقيته عامل عقد وغويشة من جزء من الشبب بتاعه والحقن، أخدت الحاجة وخرجت وكنت زعلانه كنت فاهمه لآخر دقيقة أنه بكامل قواه العقلية".

يذكر أن الفنانة يسرا تغيب هذا العام عن دراما رمضان 2024، وآخر أعمالها كان العام الماضي من خلال مسلسل "1000 حمد الله ع السلامة" مع محمد ثروت وشيماء سيف ومايان السيد وأدم الشرقاوي، والعمل من تأليف محمد ذو الفقار وإخراج عمرو صلاح.