منى زكي : نمبر وان ميخصنيش ونجاح "تحت الوصاية" سببه العمل الجماعي

وجهت النجمة المصرية، منى زكي، تحية كبيرة وشكر خاص لفريق عمل مسلسلها الأخير "تحت الوصاية" بعد تكريمها من مهرجان القاهرة للدراما، في دورته الثانية، والذي أقيم حفل افتتاحه منذ بضعة أيام في مدينة العلمين.

وقالت منى زكي خلال تصريحات تليفزيونية: الحقيقة مش أنا بس ده ناس كتير يستحقوا، الفضل الأول في الفكرة للكتاب الكبار خالد وشيرين دياب هما الأساس في الورق وكمان الشكل النهائي والصورة بتاعت كل زمايلي نتاج فنان كبير عظيم المخرج محمد شاكر خضير، إحنا شغلتنا عبارة عن عمل جماعي فيه عناصر كتير جدًا مشتركة فيه.

وتابعت منى زكي: إذا كل العناصر معملتش شغلها بحب وضمير أكيد مكنتش هتكون النتيجة كده يمك أنا اللي ظاهرة للناس والحقيقة إن اللي وار الكاميرا مجموعة فنانين وفنيين موهوبين، صناعتنا صناعة مهمة؛ مش لإنه فقط ممكن نقول منها قضايا كبيرة ولكن مجرد رسم ابتسامة ومشاركة إحساس حد فاكر إنه لوحده كل ده بالنسبة لي طوق النجاة في الحياة من وجهة نظري.

وأضافت : مش هتكلم على لقب نمبر وان لإنه حاجة متخصنيش، العمل الفني هو عمل جماعي سواء مسرحي أو تليفزيوني أو إعلامي.

 وتطرقت منى زكي للحديث عن بداياتها في مجال الفن قائلة : كنت هبقى حد بتاع يوجا بتاع ميدتيشن أو بعيدة عن المجال ده خالص، دخلت كلية إعلام عشان المجموع، وأنا كنت ابتديت أمثل من قبل ما أدخل الكلية، من زمان خالص، كنت عارفة إني عايزة أكمل في الشغل بتاعي اللي بدأت فيه من وأنا عندي 13 سنة وفي نفس الوقت مش ضامنة هعمل إيه، وكنت عايزة بابا مبسوط ومستريح مش قلقان عليا، فالظروف خلتني بالشكل.

وأردفت منى زكي قائلة: متشكرة على الحب اللي واصلني بقالي كذا يوم وممتنة لربنا ولباقي مجموعة العمل وللناس.

وأعربت منى زكي عن سعادتها الشديدة لمشاركتها في مهرجان القاهرة للدراما، المقام في مدينة العلمين، قائلة: أول مرة أحضر مهرجان القاهرة للدراما، ومحضرتش السنة اللي فاتت.. حاجة مشرفة ومنظمة، ومفيش أحلى من الساحل ومدن الساحل زي العلمين الجديدة.

يذكر أن أخر أعمال الفنانة منى زكي  هو مسلسل تحت الوصاية الذي عرض في الموسم الرمضاني 2023، وحقق العمل نجاحاً كبيرا، وضم مجموعة كبيرة من أبرز الفنانين ومنهم منى زكي، دياب، مها نصار، رشدي الشامي، خالد كمال، محمد عبد العظيم، ثراء جبيل، أحمد عبد الحميد، علي الطيب، أحمد خالد صالح، جميل برسوم، علي صبحي، نهى عابدين، والمسلسل من تأليف شيرين وخالد دياب، وتحت قيادة المخرج محمد شاكر خضير.