أحمد زاهر : الناس بتقولي يا "جوز سارة" وهذه معاناتي مع السمنة والنحافة

أعرب الفنان أحمد زاهر عن سعادته لنجاح مسلسله "نعمة الأفوكاتو" الذي نافس به ضمن الماراثون الرمضاني من بطولته والنجمة مي عمر، والذي عرض في النصف الأول من شهر رمضان.

وقال أحمد زاهر خلال تصريحات تلفزيونية: مكنتش متوقع النجاح الكبير اللي حققناه، ولكن دايما بيكون جوايا إحساس النجاح لما بتعاون مع محمد سامي، وده تامن تعاون لينا وبنفهم بعض من العينين وكيميتنا كويسة جدا.

وتابع أحمد زاهر، متحدثا عن ردود الفعل التي تلقاها بعد عن مسلسل نعمة الأفوكاتو: الناس بتشتمني في الشارع وبتقولي يا جوز سارة، بسبب دوري في نعمة الأفوكاتو، وأحيانا الواحد نفسيا بيضايق لما بيتشتم لكن أعتبر ده نجاح.

وأضاف أحمد زاهر: الفلوس بتغير النفوس وأكيد معايا دلوقتي فلوس أكتر من 20 أو 15 سنة، ولما اتشهرت والفلوس جت متغيرتش علشان أنا متربي كويس.

كما كشف زاهر، عن أن مشاركته في "نعمة الأفوكاتو"، شجعته على خسارة 22 كيلو من وزنه، حتى يظهر بشكل يناسب دور شخص هزيل ومكسور نفسيا.

واستكمل أحمد زاهر : "الدور شدني وحسيت إن الشخصية فيها حاجة، واحد مريض نفسيا ومكسور وعنده مشاكل كثيرة، والشخصية شدتني لدرجة إني خسيت 22 كيلو، بعد ما كان عندي عضلات وبلعب جيم لدوري في فيلم فارس".

وروى أحمد زاهر معاناته مع زيادة الوزن خلال فترة مرضه قائلا: "أنا لما أصابني المرض قعدت 3 سنين تعبان جدا ويائس وأحلم بالموت، وطبعا في ناس وقفت جنبي أولهم مراتي، وبدأت أعافر وأعمل مجهود علشان أنزل وزني من 185 كيلو".

وأضاف: "لما خسيت دخلت في مرحلة إني خاسس جدا ولازم أرد شوية وعملت ده، وبعدها كنت عايز أبني جسم مناسب لدور أكشن في فيلم فارس، وقعدت سنتين في الجيم ألعب حديد، وربنا كان بيساعدني".

وكان أحمد زاهر قد شارك في موسم رمضان الماضي، من خلال عمل آخر، وهو مسلسل "محارب"، الذي ضم العديد من الفنانين، أبرزهم الفنان حسن الرداد، ناهد السباعي، محمود البزاوي، محمود ياسين جونيور، ملك أحمد زاهر، نيرمين الفقي، ماجد المصري، عابد عناني، أحمد عنان، وآخرين، والعمل من تأليف محمد السيد بشير، وإخراج شيرين عادل.

وشارك في بطولة مسلسل نعمة الأفوكاتو، عدد من الفنانين، وهم الفنانة مي عمر، أحمد زاهر، أروى جودة، عماد زيادة، سلوى عثمان، هدير عبد الناصر، وغيرهم من الفنانين.