عايدة رياض : مش ندمانة على أدوار الاغراء وأفلام المقاولات وهذه قصتي مع عادل امام

أثارت تصريحات الفنانة المصرية عايدة رياض، الكثير من الجدل على مواقع التواصل الاجتماعي، بعد ما أكدت أنها غير نادمة على أدوار الإغراء التي قدمتها خلال مسيرتها الفنية.

 وتابعت عايدة رياض خلال حوارها ببرنامج «واحد من الناس» عبر قناة الحياة: « مش خايفة انهم يقولوا عني بحب الإغراء، إذا كان قالوا عليا كذا كذا، وعملولي قضية، هزعل من بوسة!! أنا كان ظروف وقتها وكنت حاسة بظلم، وحاسة ما هم قالوا هيقولوا إيه تاني، ده شغل اللي كان موجود وكنت عايزة أشتغل، واشتغلته من قلبي وبصدق".

ولفتت رياض إلى أنها غير نادمة أيضًا على أفلام المقاولات التي لعبت بطولاتها، مشيرة إلى أنها لم تحصل منها على الأموال التي يقول عنها البعض.

ونوهت الفنانة عايدة رياض إلى أن الأجر الذي تحصل عليه الآن، لا يساوي تاريخها الفني ولا حجم موهبتها.

وعن أدوار "الراقصة" التي تلعبها في أعمالها الفنية، قالت:"ياريت، يتعرض عليا دور كامل، كان نفسي في يوم من الأيام أعمل فيلم زي نعيمة عاكف أو تحية كاريوكا".

تحدثت عايدة رياض عن أفلامها مع عادل إمام وقالت: "مشهدي مع عادل إمام لما كنا احنا الاتنين بنضرب بعض المخرج شريف عرفة أخده مشهد واحد، والمشهد ده كان ضرب نار ولا يمكن ينسى، وأنا بعمل بروفة قبل التصوير عادل إمام قال لي خلي بالك واضربي على الهوا ورجلك بس تتفرد مش نضرب شالوت في الجسم، واشتغلنا في تصوير مشهد البوس وبعدين لقيته بيضرب بجد وأنا كنت بقى رياضية رُحت قايمة واديتله بالروسية وعملت مجهود علشان أضربه بالرأس وفعلًا الضرب كان بجد لدرجة إنه قال لي يا بنت اللذينا وبعدين حطني على الترابيزة وبعدها كان فيه تقطيعات".

وأضافت :" عادل ميزته إن لو فيه كلوز للمثل هو بيقف له وقليل أوي اللى يعمل كده، وكان يقف قدامي علشان يديني الإحساس صح بالظبط ويبص لي ويعمل لي حركات".

وتابعت :"المشهد بتاع العربية اللي كان دمه خفيف، والمشهد الخطير بتاع مديرية الأمن دا ما يتنسيش طبعًا وجامد جدًّا والقبلات اللي فيه، وعجبني الأكشن بتاع حسين فهمي، ولما اتفرجت على الفيلم أنا نفسي اتخضيت وهو بيدي له المنديل يمسح الروج، كل مشاهد الفيلم كان فيها خفة دم".

واستكملت :" في نفس السنة عملت مع الفنان محمود عبد العزيز فيلم الكيت كات، وهو وعادل إمام عمالقة تمثيل، وشريف عرفة كان شاب صغير وداود عبد السيد أكبر وأنضج وكل واحد له رؤية، الكيت كات فيه بوس وبيقولوا فيلم إغراء والعمل عايش لإن داوود عبد السيد كان يجي لي يفهم لي الفيلم وأبعاده كلها ويقول لي شريف منير دا حب حياتك وعايز أحس إنك بتحبي قلت له حاضر وقال لي عايز واحدة بتحب حد وبتتمناه وفيه حاجات فرشها لهذا الموضوع وقال لي لما تبوسي شريف منير أنتِ فعلًا بتحبيه بجد، وداوود عبد السيد بيحب الإحساس أوي والسينما إحساس أكتر من أي حاجة".

وتطرقت عايدة رياض إلى موضوع إصابتها بالسرطان وقالت إنها شعرت ببعض المتاعب الصحية خلال تصويرها مسلسل «دهشة» مع الفنان يحيى الفخراني، مشيرة إلى أنها فوجئت بالخبر مثل أي مريض.

وتابعت:"خضعت لبعض التحليل دون أن تعلم طبيعة مرضها، لافتة إلى أن الطبيب المعالج لها أجرى «منظار»، وأثبتت العينة إصابتها بالسرطان.

ولفتت:"عند إجراء الجراحة، وخلال جلسات العلاج الكيماوي، كانت تعمل في مسلسل مع مى عز الدين. ولفتت إلى أن الطبيب المعالج لها طلب منها ارتداء باروكة، بسبب سقوط شعرها، نتيجة العلاج الكيماوي، مشيرة إلى أنها لم تكن تعرف سبب طلبه".

واختتمت:" بعد ما خلصت الجلسات وعملت مسح ذرى، وطلع سليم الحمد لله، الدكتور طلب منى أشيل المثانة وأركب مثانة صناعية"، مؤكدة أنها رفضت الحديث عن هذه الأزمة، لأنها لم تكن تريد أن يفهم البعض إعلانها بشكل خاطئ على أنها تحتاج إلى المال، مشيرة إلى أنها كانت أيضاً تريد ألا يؤثر ذلك على أعمالها الفنية.