غادة عبدالرازق : لست ممثلة إغراء ولهذه الأسباب استعنت بطبيب نفسي!

تحدثت الفنانة غادة عبد الرازق عن ارتباط اسمها بأدوار الإغراء، وعلاقتها بالدين ونظرتها للحجاب وتفاصيل استعانتها بطبيب نفسي.

وقالت غادة عبد الرازق في تصريحات تليفزيونية: اسمي ارتبط بالأفلام الجريئة بعد فيلم الأجندة الحمراء، والارتباط ده ظلمني وخلاني لمدة 6 سنين بيصنفوني إغراء، وبذكاء مني بدأت اختار أدوار تانية وعملت مجهود جامد علشان أغير النظرة دي.

أما عن نجاحها في مسلسل مع سبق الإصرار، أضافت غادة عبد الرازق: كان عندي غرور رهيب بعد نجاح مسلسل مع سبق الإصرار، وحسيت إن الدنيا كلها مفيهاش غير غادة عبد الرازق بس، والشهرة لما بتزيد عن اللزوم بتغربل حياة البني آدم، وأنا دلوقتي معنديش أصحاب.

كما تحدثت الفنانة غادة عبد الرازق، عن تفاصيل استعانتها بطبيب نفسي، قائلة: استعنت بالدكتور النفسي من وقت ما شوفت بنت خلصت حياتها بإيديها.. وطول عمري باخد مهدئات وأنا بخاف من الوحدة، وربنا مبيديش كل حاجة، وأكيد أنا واخدة الـ 24 قيراط زي ما مكتوب ليا، ولو ربنا كاتبلي أن الـ 24 قيراط بتوعي بالمرض النفسي فأنا راضية.

وأكدت الفنانة غادة عبد الرازق، أن عقلية الرجل المصري لا تتقبل شخصية المرأة القوية ولا نجاح المرأة.

وأوضحت غادة عبد الرازق أن عقلية الراجل المصري صعب تتقبل الشخصية القوية زيي، الراجل مبيحبش الست تبقى أقوى أو أنجح منه، واللي قابلته في حياتي العاطفية الراجل اللي بيدوس على كرامة المرأة لأني ناجحة، والأمان في أقرب الناس ليا مش في شريك الحياة، وشيلت فكرة الجواز من دماغي.

أما عن شخصيتها في فيلم الريس عمر حرب، علقت غادة عبد الرازق قائلة: الفيلم ده من أكتر الأفلام اللي بحبها جدًا، لأنه كان فيلم جرئ جدًا وقصته غريبة، أنا حبيت الدور أوي كان مركب وغريب ومش عارفة كنت هلعبه من أي جهة، وبعد الفيلم ما اتعرض كل الناس كانت متخيلة أن الشخصية مرسومة كده، ولكن أنا اللي رسمت الشخصية.

وعن مشهدها الشهير مع الفنان هاني سلامة، خلال أحداث فيلم الريس عمر حرب، فقالت: كنا حاطين روج تحت الأضافر علشان يبان إني خربشته، ولكن أنا عشقت الفيلم ده وحبيته وأكيد الحاجات دي بتحصل والكاتب مش جايب ده من برا.

وتطرقت غادة للحديث عن موضوع الاعتزال قائلة : فكرت في الاعتزال كذا مرة وبرجع في قراري، لكن دلوقتي لأ، حتى لو عايزة اعتزل هسيب الاعتزال ييجي بطريقة ربانية مش بقرار مني، لما ربنا يقولي كفاية عليكي كده.

وتابعت غادة عبد الرازق: أنا ملتزمة دينيًا الحمد لله ومش من الشخصيات اللي بتلبس حجاب، لكن هو حاجة كويسة وأغلب أهلي محجبين، ومفيش عندنا حاجة اسمها إجبار على الحجاب.

الجدير بالذكر أن الفنانة غادة عبد الرازق تخوض السباق الرمضاني المقبل 2024 من خلال مسلسل صيد العقارب، في عمل من بطولة رياض الخولي، محمد علاء جامايكا، سيمون، فريد سيف النصر، عماد صفوت، أحمد ماهر، ميار الغيطي، سامية عاطف، مجدي بدر، أحمد ماجد، وغيرهم من الفنانين.