مطرب المهرجانات مسلم : لا أؤمن بحرمانية الفن وصوتي أفضل من عمرو دياب!

رفض مطرب المهرجانات "مسلم" مقارنته بنجوم الغناء ومطربي المهرجانات، مؤكدًا أنه لا يعتبر نفسه من بين مطربي المهرجانات الشعبية.

وقال مسلم في تصريحات تليفزيونية : في أعلى من عمرو دياب، وحسين الجسمي أعلى واحد في العالم ليا، وعمرو دياب 40 سنة على القمة عشان تقيل ومختفي دايمًا، ونفسي اتميز زي سعد لمجرد لأنه سكتي، وعمرو دياب مش محتاج حد يقلده لأن صوته عادي، ومش قوي صوتيًا لكن تسمعه تحبه، أما أنا الاتنين، لو ربنا كرمني ووقفت قدامه هنشوف الحتة دي، لأن هيبقى رأي الناس، وأنا 23 سنة وعامل كده ما بالك لو 30 سنة هوصل لفين.  

وتابع مسلم : عندي شهوة الشغل والفلوس، وأنا مدير أعمالي، وبحب الفلوس أوي، الفلوس بتعمل كل حاجة، وقادرة تخلي الناس اللي مكانتش بتبصلك، تبصلك، وعشان أنا متربي تربية مش شبه الجيل ده أنا واللي شغالين معايا، وبالنسبة لي الفلوس مش كل حاجة، لكن دلوقتي بقيت اعتمد أن الفلوس كل حاجة.  

وأضاف مسلم: كام واحد قال الفلوس مش كل حاجة لما مسك فلوس بقى إيه، ناس كتير اتغيرت، أصل من غير فلوس هنعمل إيه، لو مشتغلتش على نفسي واتعب واجيب فلوس وأتطور وأطلع وأركب أحسن عربية وأسكن في أحسن بيت والبس أحسن لبس، الناس أكيد مش هتعمل لك حساب.

وعن الفنان محمد رمضان، فعلق مسلم: رأيي في محمد رمضان أنه ناجح، واللي بيعمله حرية شخصية، لكن عمري ما أعمل كده، لأني بعمل الفلوس لنفسي، محبش حد لسه بيحاول يجتهد يشوف اللي عندي ويزعل ويضايق، لأني كنت مكانه في يوم من الأيام، أنا وسلطان الشن أخوات وبنتكلم وهو كويس، وعمري ما حسدت حد.

وعن سبب اختياره لاسمه الفني "مسلم" قال : وأنا عمري 15 سنة، كنت مسؤول عن جامع وبفتح المسجد وبأذن في المسجد لمدة 3 سنين بشكل متواصل، وكنت ملتزم ومتدين، ولكن أنا كنت مكتشف أن صوتي حلو من قبل ما أذن.

وأضاف مسلم: بحب الغناء وبغني من وأنا 8 سنين، وأبتديت أذن وأكون مسؤول عن الجامع اللي جمب بيتي وافتحه للناس من سن 15 سنة ولحد ما كان عمري 18 سنة مسؤول عن الجامع، وكانت فترة جميلة واللي خلاني ارجع أغني لأني كنت بحب موهبتي أوي وصوتي بقى كويس بسبب تجويد القرآن لأنه بيحسن الصوت.

وأكمل مسلم: تعبت واتمرمطت أوي عشان أرجع أغني وكان حلمي أوصل بموهبتي لهدف أقول أني هوصل وهعمل ده، بغض النظر عن تقديمي للقرآن، ومبقتنعش بكلام الشيوخ أن الغناء حرام والدين بتاعنا ده دين الأخلاق وربنا هيحاسب كل واحد على نواياه.

وكشف مسلم أنه أصبح غير ملتزم مثل السابق موضحًا: ممكن أصلي ولكن في حاجات بتفوتني ومش ملتزم زي الأول وأن شاء الله ربنا يهديني وأرجع تاني التزم، ومتقطع في الصلاة بسبب شغلي غصب عني لأني ملتزم في حاجات كتير لازم اعملها زي وبنود عقود لازم أعملها وفي حاجات كتير بتسحلني وكفاية اللي أنا فيها حوار الجواز والخطوبة.