بعد انفصاله فنياً عن زوجته .. أحمد العوضي: الدنيا أرزاق والفن مش حرام

كشف الفنان الشاب أحمد العوضي، عن رأيه في بعض الأمور، أبرزها قضية تحريم الفن، وقال في تصريحات صحفية:" للناس اللي بتقول الفن حرام، كل واحد حر يقول اللي يقوله، بس أنا عن نفسي شايف إن الفن مش حرام بالمطلق، أصل الممثل ده مش بيبيع منكر".

وتابع:"الممثل بإيده يخلي الفن حرام أو مش حرام، وده عموماً في كل الشغلانات، الصحافي والدكتور ممكن يخلّي شغلانته حرام أو مش حرام، لكن فيه شغلانات هي فعلاً حرام مهما حاولت تجمّلها".

وأضاف:"الفن يكون حرام لما تقدّم حاجة مش صح والشباب تقلّدك فيها، تخلّيهم يروحوا في اتجاه غلط، الفن بيكون نوع من الترفيه، مع إضافة موعظة فيه، لكن مش إن يكون العمل كله مواعظ، لأني لو عايز أوعّي الجمهور بشكل كامل أروح أعمل برنامج أحسن".

وأشار:"بعذر الناس اللي بتقول الممثل غني ومعاه فلوس ومش بيتعب، ومينفعش أستفزه وأطلع أقول أنا عليّ أقساط، لأن فيه ناس فعلا حالتها المادية صعبة".

ولفت :"في ناس بتكون بتشتغل شغلانات مرهقة  وصعبة وفي الآخر بيقبض فلوس ميقدرش يصرف بيها على ولاده، وفي نفس الوقت بيشوف إن الممثل بيكسب فلوس كتير برغم إنه مش بيتعب نص التعب اللي هو بيتعبه".

واستكمل:" الدنيا أرزاق، بس أنا دوري كفنان وربنا أمرني، إني لو باخد 5 جنيه وشوفت واحد بياخد بريزة، وأنا في إمكنياتي، يبقى واجب عليّ أساعده".

وتحدث العوضي، عن فكرة إفصاح الممثل عن رأيه على الملأ، مشيرًا إلى أن هذا دور الشخصية المشهورة، وقال: بطلع أقول رأيي عادي في الموضوعات مدام رأيي مفيهوش تجريح أو إساءة لحد، ما هو أنا قدوة لناس بتحبني، فـ لو فيه كلام مغلوط بيتقال، دوري إني أوعي الناس وأقول الصح".

وكشف عن خطّته لموسم رمضان 2024، مؤكداً أنه سينفصل فنياً عن زوجته الفنانة ياسمين عبد العزيز، وأن العمل الذي سيشارك فيه سيحمل الطابع الشعبي، مبيناً أن انفصاله عن زوجته لا يعني انفصاله عنها فنياً الى الأبد، ولكنهما ينتظران أن يجمعهما عمل جيد كأعمالهما السابقة.

وتحدث عن مفهومه لمصطلح السينما النظيفة، مؤكداً أنه يؤمن به لأن من المهم تقديم أعمال سينمائية لا تخدش حياء الجمهور. إذ قال: "أنا مؤمن إن في حاجة اسمها سينما نظيفة، لأن إيه المشكلة إني أعمل فيلم من غير ما أخدش حياء المشاهد، بس في ناس بتطلع تقول إن السينما سينما ومفيش حاجة اسمها سينما نظيفة، وإن لو مش عاجبك السينما بكل حالتها يبقى سيب الشغلانة، لأ مش هسيبها، وهفضل مقتنع بالمصطلح ده.

وتابع:" لو مفيش سينما نظيفة يبقى مش هيكون في فرق بين السينما بتاعتنا وبين سينما المنصات العالمية، اللي بتشجع على موضوعات أنا محبش ابني أو أخويا الصغير يتفرج عليها. السينما النظيفة بتشمل موضوعات كتيرة ومتنوعة، زي الأكشن والدراما والكوميديا، وإني أطلع أعمل أكشن وأضرب حد زي في مسلسلاتي مثلاً، ده مفيهوش حاجة غلط لأني لم أسئ للذوق العام".