ساحر الفيوم المزعوم يرد على المعزول

في تداعيات جديدة لأزمات رئيس الزمالك المعزول، مرتضى منصور، خرج رجب محمد محمد شحاتة، وشهرته رجب بحة، وأهالي قرية منية الحيط بمركز إطسا في محافظة الفيوم، في بث مباشر للرد على اتهامات المستشار مرتضي منصور، بعد عرض الأخير صورة رجب وذكر اسمه واسم قريته في بث مباشر، وجه له فيه تهمه استخدام السحر الأسود لهزيمة الزمالك في مباراته مع الأهلي.

ووسط غضب من أهالي القرية، وتجمع أقارب رجب بحة، الذي ظهر كمواطن بسيط، قال الأخير: "سيادة المستشار متهمني بالباطل إن أنا بسحر، وأنا راجل أمي لا بعرف أقرأ ولا أكتب، ولا بعرف أعمل حاجة، وقسمًا بالله العظيم، قسمًا بالله العظيم مرة تانية، إنّي ما بعرف أعمل الحاجة دي، واللي بيعملها بيقي مشرك بالله، وأن راجل شغال بنا عامل بإيدي، شغال أرزقي، ولو تيجي تتفرج على المعيشة اللي عايشينها، وبيتي إللي عايش فيه، مش هترضاه لنفسك، وسمعتي وسمعة ولادي، كده غلط وكده ما ينفعش، وحرام عليك لما تشوه سمعتي بالطريقة دي، ومعايا عيال وبنات على وش جواز، وأنا حافظ قرآن".

وظهر في الفيديو أسرة رجب، وقال أحدهم" " اتهامات باطلة، مين اللى اداك الحق تتكلم على ولاد الناس، مافيش راجل دولة يقول الكلام ده، الراجل ده مالوش علاقة بأهلي وزمالك، هو يعني رجب اللى خلي لاعبتك تقلش إمبارح، أنت لاعبتك اللي تعبانة".

وقال آخر: "الكلام اللى بتقوله دا يا سيادة المستشار غلط، لأنّ الراجل دا إمام مسجد، وبنصلي وراه، وهنقوم نصلي الفجر دلوقت وهو بيصلي الإمام بتاعنا، وكده غلط إنك تقول عليه ساحر، هو مش ساحر، ولو كان هيسحر كان سحر لنفسه واتغني".

وأضاف ثالث من أهالي منية الحيط بمركز إطسا في محافظة الفيوم، "يا سيادة المستشار إحنا زملكاوية، ومش مقتنعين بموضوع السحر، وإحنا مع الراجل دا إللي هو ابن عمنا، ومفيش أسحار ولا الكلام دا".

ووفقًا للمعلومات التي انتشرت على معظم المواقع الرياضية، فإنّ رجب محمد الشهير بـ "رجب بحة"، يعمل في الرخام وأعمال البناء. ولا علاقة له بكرة القدم، ولم يعرف عنه ممارسة مثل هذه الأعمال.

وكان مرتضى منصور رئيس نادي الزمالك المعزول، قد اتهم شخصاً، يدعى رجب بحة، بالقيام بأعمال سحر وشعوذة، ما تسبب في خسارة فريقه أمام الأهلي 1-4 في بطولة الدوري.